पाथळ और पीथळ

अरै घास री रोटी ही जद बन बिलावडो ले भाग्यो |
नान्हो सो अमरयो चीख पड्यो राणा रो सोयो दुःख जाग्यो ||

हूँ लड़यो घणो हूँ सहयो घणो
मेवाडी मान बचावण नै ,
हूँ पाछ नहीं राखी रण में
बेरयां रो खून बहावण में ,
जद याद करूँ हल्दी घाटी नैणा में रगत उतर आवै ,
सुख दुःख रो साथी चेतकडो सूती सी हूक जगा ज्यावै ,

पण आज बिलखतो देखूं हूं
जद राज कंवर नै रोटी नै ,
तो क्षात्र – धर्म नै भूलूं हूं
भूलूं हिंदवाणी चोटी नै
महला में छप्पन भोग जका मनवार बिना करता कोनी,
सोनै री थाल्याँ नीलम रै बाजोट बिना धरता कोनी ,

ऐ हाय जका करता पगल्या
फूलां री कंवळी सेजां पर ,
बै आज रुले भूखा तिसिया
हिंदवाणे सूरज रा टाबर ,
आ सोच हुई टूक तड़फ राणा री भीम बजर छाती ,
आँख्यां में आंसू भर बोल्या मै लिख स्यूं अकबर नै पाती,
पण लिखूं कियां जद देखै है आडावल ऊँचो हियो लियां ,
चितौड़ खड्यो है मगरां में विकराल भूत सी लियां छियां ,

मै झुकूं कियां ? है आण मनै
कुळ रा केशरियां बानां री ,
मै बुझुं कियां ? हूं सेस लपट
आजादी रै परवानां री ,
पण फेर अमर री सुण बुसक्याँ राणा रो हिवडो भर आयो ,
मै मानूं हूं दिल्लीस तनै समराट सनेसो कैवायो |
राणा रो कागद बांच हुयो अकबर रो सपनूं सो सांचो ,
पण नैण करयो बिसवास नहीं जद बांच बांच न फिर बांच्यो ,

कै आज हिमालो पिघळ बह्यो
कै आज हुयो सूरज सितळ ,
कै आज सेस रो सिर डोल्यो
आ सोच हुयो समराट विकळ,
बस दूत इशारों पा भाज्या पीथळ नै तुरत बुलावण नै ,
किरणां रो पीथळ आ पुग्यो आ सांचो भरम मिटावण नै ,

बीं वीर बांकू डै पीथळ नै
रजपूती गौरव भारी हो ,
बो क्षात्र धरम रो नेमी हो
राणा रो प्रेम पुजारी हो ,
बैरयां रै मन रो काँटों हो बीकाणू पूत खरारो हो ,
राठौड़ रणा में रातो हो बस सागी तेज दुधारो हो ,

आ बात पातस्या जाणे हो
घावां पर लूण लगावण नै ,
पीथळ नै तुरत बुलायो हो
राणा री हार बंचावण नै ,
म्हे बाँध लियो है पीथळ सुण पिंजरे में जंगळी शेर पकड़ ,
आ देख हाथ रो कागद है तूं देखां फिरसी कियां अकड़ ?

मर डूब चलू भर पाणी में
बस झुन्ठा गाल बजावै हो ,
पण टूट गयो बीं राणा रो
तूं भाट बण्यो बिडदावै हो ,
मै आज पातस्या धरती रो मेवाड़ी पाग पगां में है ,
अब बता मनै किण रजवट रै रजपूती खून रगां में है ?

जद पीथळ कागद ले देखी
राणा री सागी सैनाणी ,
निवै स्यूं धरती खसक गई
आँख्यां में भर आयो पाणी ,
पण फेर कही ततकाल संभळ आ बात सफा ही झूंठी है ,
राणा री पाघ सदा ऊँची राणा री आण अटूटी है |

ल्यो हुकुम हुवै तो लिख पूछूं
राणा नै कागद रै खातर ,
लै पूछ भलांई पीथळ तूं
आ बात सही है बोल्यो अकबर ,
म्हे आज सुणी है नाहरियो
स्याला रै सागै सोवैलो ,
म्हे आज सुणी है सूरजडो
बादळ री ओटा खोवैलो ,

म्हे आज सुणी है चातगडो
धरती रो पाणी पिवैलो ,
म्हे आज सुणी है हाथीडो
कूकर री जूणा जिवैलो ,

म्हे आज सुणी है थकां खसम
अब रांड हुवैली रजपूती ,
म्हे आज सुणी है म्याना में
तरवार रवैली अब सूती ,
तो म्हांरो हिवडो कांपै है मुछ्याँ री मोड़ मरोड़ गई ,
पीथळ नै राणा लिख भेजो आ बात कठे तक गिणा सही ?

पीथळ रा आखर पढता ही
राणा री आंख्यां लाल हुई ,
धिक्कार मनै हूं कायर हूं
नाहर री एक दकाल हुई ,

हूं भूख मरूं हूं प्यास मरूं
मेवाड़ धरा आजाद रवै ,
हूं घोर उजाडा में भटकूं
पण मन में मां री याद रवै ,
हूं रजपूतण रो जायो हूं रजपूती करज चूकाऊँला,
औ सीस पडे पण पाघ नहीं दिल्ली रो मान झुकाऊँला,

पीथळ के खिमता बादळ री
जो रोकै सूर उगाळी नै ,
सिंघा री हाथळ सह लेवै
वा कूख मिली कद स्याळी नै ?

धरती रो पाणी पिवै इसी
चातक री चूंच बणी कोनी ,
कूकर री जूणा जिवै इसी
हाथी री बात सुणी कोनी ,

आं हाथां में तरवार थकां
कुण रांड कवै है रजपूती ?
म्याना रै बदले बैरयां री
छात्याँ में रैवै ली सूती ,
मेवाड़ धधकतो अंगारों आंध्यां में चमचम चमकैलो,
कड़खै री उठती तानां पर पग पग खांडो खड्कैलो ,

राखो थे मुछ्याँ एठ्योड़ी
लोही री नदी बहा दयूंला ,
हूं अथक लडूंला अकबर स्यूं
उज्ड्यो मेवाड़ बसा दयूंला ,
जद राणा रो सन्देश गयो पीथळ री छाती दूणी ही ,
हिंदवाणों सूरज चमकै हो अकबर री दुनिया सूनी ही |

कन्हैया लाल सेठिया की इस कालजयी रचना की 3gp file आप यहाँ चटका लगाकर डाउनलोड कर सकते है जिसे मोबाइल में सुना जा सकता है | कंप्यूटर में सुनने के लिए वी एल सी प्लेयर या क्लासिक मीडिया प्लेयर का प्रयोग करें

8 Responses to "पाथळ और पीथळ"

Leave a Reply

Your email address will not be published.

This site uses Akismet to reduce spam. Learn how your comment data is processed.